ضلوع تعاوى من سبب قلبها المفقود
افقدته وفقد القلب بالحيل موجعها
تلفت على اللي تلته مير مامن فود
تعزوى وتنخاني وتشر باصابعها
تقول امكنه وان ما مكنته ماهو مردود
وانا اسمع نداها مير ماني بطايعها
بلى خابر اللي تلته والرجا ممدود
عساها ترفق يوم قلبي غدى معها
وانا جايز لي ضيعته مع عقيد الخود
عساها تردد لين تاصل مسامعها
دخيل المدامع.. لا دخيل العيون السود
لا والله دخيل عيونها مع مدامعها
ظفاير شعرها غازلتها هبوب النود
ياحظ الهبوب وطيب الحظ رافعها
مثل ما تغيض من الندى كف راع الجود
مثل ما تغيض من المحاسن طبايعها
هنوف تجر من الغيا ثوبها الماهود
كساها العفاف من القدم لين مفرعها
