عاد عيدك يا الوطن وانت بسلام
وكل عامٍ وانت في عزٍ وخير
رفرفت فوق ارضك اسراب الحمام
وانتشى برياضها عطر وعبير
يسري الساري بعتمة هالظلام
آمنٍ ما يشغله طول المسير
والطفل في حضنك الدافي ينام
غافلٍ عن نعمة الأمن وغرير
والمصلين المزكين الصيام
شفتهم بالفيّه ولفح الهجير
يطلبون الله تعز ولا تضام
يا وطن خيرك على الدنيا وفير
عاد عيدك وانت في صدري غرام
وافتخر لا قالوا بحبك أسير
في وصوفك ما يكفيني الكلام
ومهما قلت بحقك مقصر كثير
أشهد ان اللي يحبك ما يلام
وشعر ما يمتاز بك عمره قصير
مكه أطهر أرض والبيت الحرام
والمدينة مسجد الهادي البشير
شمعتين ونور للدين الختام
يا وطن ينشر ضياها ويستنير
نصرةٍ للحق بنسل الحسام
وعن ثراك الموت نختاره مصير
الثرى اللي يحن له حتى الغمام
من بعد غيبه همى دمعه غزير
يا وطن غيرك من الدنيا حطام
التقى التاريخ بك واصبح كبير
وصار بك دايم شغوف ومستهام
مخلدٍ ذكرك ولا غيرك جدير
قصتك تجلي عن الدنيا العسام
بالذي صار ومضى واللي يصير
قصةٍ نوقف لها بكل احترام
تستفز الدهشه بعين الضرير
من قصور الطين وظلال الخيام
والضمير الحي والجفن السهير
يا وطن مالي بعد عشقك مرام
انت حبي الأول وحبي الأخير
