صابني بالحب غروٍ بعد عمره صغير
حش معلوق الضماير وحاول يقطعه
وسط عينه ياالربع شفت لي سيفٍ شطير
والسهوم الدامية حولها متجمعه
والبلا أنه ما درى يا ملا باللي يصير
دالهٍ قلبه وقلبي خذه مني معه
قلت أنا له يا بعد من على الدنيا يسير
شوفتك مطلب فوادي وقربك مطعمه
لا تدبر دون ما أسمعك يا نفح العبير
أنطق بكلمة لخلك ولو تودعه
أرحم اللي صار من سبتك وضعه خطير
والتفت ثم قال أنا لك سرابٍ تتبعه
ثم قفى لين العود عجلٍ في المسير
ثم قفى آه من ذا المفارق ما أشنعه
يا وجودي وجد من طاح في الهية كسير
قفوا ربوعه ولا حوله اللي يمنعه
كن في وسط الحشا من بعد فرقاه كير
كل ما هدّى عدى نافخه ثم ولعه
ما جدا لي إلا الشعر عقب مدعوج النظير
بأنشر أبياتي عساها تطرق مسمعه
