بديت بذكر خلاق البرايا الواحد المعبود
إله الكون علام الخفايا منش الامزاني
وبعد ذكره علاشانه هلا حيا الله ابن اسعود
أبوخالد ولد عبدالعزيز النائب الثاني
قدومه عيد مع عيد ارمضان يفوح مثل العود
يطيب الفال مع سوقه على ذربين الايماني
هلا ما غرد القمري وما ذعذع هبوب النود
وعدد من نعموا لاحل ذكر الشيخ سلطاني
تراحيب الوفا من خافقٍ وافي وفاه يزود
لحكامه مدابيس الوفا حكام الأوطاني
يا أبوخالد يا عون اللي من حمول الدهر مضهود
سموك سامياً فوق القصيد وفوق الأوزاني
يحير الشعر والشاعر بوصفك يا حليف الجود
تجمل فيك وصبح له مع اللي يستمع شاني
اليا حل الوغا ليثٍ بيمناه ابترٍ مجرود
وللملهوف غيثٍ ساقه المعبود هتاني
بفعل الخير لك باعٍ طويل وموقفٍ مشهود
اليا ما صرت له يا معرب الجدين عنواني
كما عد الروى هداج رمز وعيهلٍ مورود
اليا زادوا وروده زاد جمه ماله اقراني
عشقت الهمه العليا وصارت لك هدف منشود
بك أوصاف الزعيم وبك وصايف طير حوراني
اقوله والله الشاهد وواعين القلوب اشهود
تعابير الولا يشهد بها القاصي مع الداني
ولانا لهل العوجا على وضح النقا معقود
مع الراحل من عصور الجدود أيام الأكواني
توصوا فيه ووصونا وحنا نوصي المولود
ولانا لوليانا ما يتغير طول الأزماني
لكلش حد كود آمالنا فيكم بدون حدود
نعيش الحلم واقع ويتجدد حلم وأماني
أعزاز وعزنا الله بالسعود وشعبنا محسود
ملوك العدل حكامه ودينه خير الأدياني
على هدي النبي والمصحف المنزل بدون قيود
حكم عبدالعزيز وطوع العاصين شاماني
شجاع وفاقدٍ غالي بقلبٍ كنه البالود
تقدم بالجموع سلاحه الفتاك الايماني
لفا شبه الجزيرة والجهل والخوف فيها يسود
تمنا شوفته وتبادله شوقه والأحزاني
تعزوة فيه يا معزي وحقق غاية المقصود
جلا عنها الجهل والعلم عم وعم الأماني
جنينا أثمار زرعه واهتنينا ما شكينا الكود
عساه امجار شر النار له يالخلد مسكاني
بقا بقلوبنا عايش وجثمانه بقبر العود
ومن بعده على نهجه من الأبطال رباني
حكمنا سعود والفيصل وخالد والفهد موجود
عسى عمره طويل يواصل الرحلة كحيلاني
محنك باتعٍ رايه يبين إن حك عود بعود
إليا بانت مجاهيم المصايب قدمها باني
بعيد الرمس أبوفيصل عن احدود البلاد يذود
ولي العهد عبدالله معه في كل ميداني
عوين الفهد أبومتعب بقلبٍ مثل حد الطود
تحمل للحمول ولا اشتكا منها بليهاني
بتوجيه الفهد رمز البلد بالموقف المحمود
تفقد حال قاسين الظروف بوازع انساني
وبي من سيدي سلطان عذره والغطا مردود
على الشاعر ونا ما قول قول بدون برهاني
وختمها هلا يا سيدي سلطان رمز الجود
عدد من نعموا لاحل ذكر الشيخ سلطان
