ابدى بذكر اللي رفيع«ن» جلاله
منزل آيات الهدى والرساله
يارب وفقنا لصالح عملنا
نسألك غيرك يالولي مانساله
سبحان من فضل بن آدم بعقله
ينعم على عبده ويعلم بحاله
للشعر دور«ن» في مجالات شتا
والشاعر الى حكم البيت قاله
والدين يصحاب العقول النصيحه
اقولها من خاطري بالاصاله
والنصح يجدي بالشباب المثقف
يحرس على حاله ويحرس بماله
قصيدتي تنخى شباب الجزيره
أهل الوعي وأهل الفكر والبساله
لا للمخدر كيف نرضاه واسمه
اسمه مخدر يعني اكبر دلاله
انه من انواع الحروب المشينه
اللي لها تأثيرها لا محاله
ان صورت تصوير تأتي بعكسه
وأول مآسيها السجن والبطاله
حنا وهبنا الله عقولاً سليمه
لا ما نحول علمها للجهاله
اللي تشجع لرتكاب الجريمه
ايضاً وفقدان العقل والخباله
دوافعاً ياشينها من دوافع
ياشين صاحبها وياشين فاله
انخاك تكفى يالشباب السعودي
تكفون يا هل المرجله والاصاله
انخاك لا ترضى بقبح المسمى
المدمنين اطلق عليهم حثاله
ينخالكم اللي يفتخر في هويته
مستحلف«ن» بالله ويدخل دخاله
شاعر ويشعر في معاناة جيله
يحدف له شماغه ويحذف عقاله
الرجل ما يرضى لنفسه مذله
من يفخر بنفسه وجده وخاله
يعز نفسه ويتمسك بدينه
ويجني نتائج سيرته واعتداله
والمذنب اليا تاب رد اعتباره
من يتجه في منهج الخير جاله
والخير فينا والامن في وطنا
حكامنا تحكم بحكم العداله
واجب علي اهدي لكم هالقصيدة
ابيات شعراً قلتها في عجاله
