من سرق مني سهادي والمنام
من جرح نفسي وكبدي علها
كيف غنى الحزن في جوي وحام
والهواجس للحشاء من دلها
واللهإني قبل ذا آخر تمام
لين تفكيري سيوفه سلها
ترتفع فيني على حد الغمام
لين هذيك النجوم أوصل لها
المشاعر طين ما تحمل ملام
والمصيبة هالزمان يبلها
والظروف اللي تحط من المقام
مشكلة وإن كان ما تفطن لها
تدرك حتى تشوف الانهزام
وتطرحك بين الهوان وذلها
لو تجي الدنيا على شف ومرام
ما نشف ريقٍ ولا أحد ملها
مرةٍ تصفي ومرة يا حرام
ما تجي حلوه ليالك كلها
بس يا دنيا تظيمين الحشام
ما بقى غير الدموع أهلها
جيت بامشي لك بشيمه واحترام
با ترك الهزلة وادوّر جلها
والحياة أحياء بها برد وسلام
أهجر الرمضاء وادور ظلها
ما نفع حرصي ولا ينفع كلام
مارلا كثرت همومك جلها
