ياعين هلي صافي الدمع ياعين
هلي غزير الدمع ياعين هلي
والله ملومك لو بقيتي تهلين
أبكي وزيدي فاقداً غالياً لي
أبكي على أمي والمخاليق ممسين
أبكي ولو كثر البكاء مايسلي
أبكي على اللي غادرت يوم الاثنين
دنياً غرور وما عليها مولي
يا لله ترحم من على الستر والدين
تمسكت فيهن ولاهي تزلي
مرحومة من هي على العسر واللين
صوامة قوامة ما تمليي
يا لله عسى من مالك الملك تجزين
في الجنة الخضراء عساها تحلي
ويقبل عزانا فيك ياربعي أمين
يا واحداً من لاذبك ما يذلي
وتمت ولو قلت القصايد ملايين
أعجز عن التعبير لو قلت يا اللي
وصلوا على اللي مرسلن للثقلين
شفيع الأمة يوم نشر السجلي
