يا الله يا كافي عن الغافلينا
عجل الفرج يوم اكتراب الدواليب
البارحه يوم العرب هاجعينا
انا خوي للدلال المحاديب
ونجر صياحه يقعد النايمينا
طعامه الهيل الخضر تو ماجيب
وخلاف ذا ياركب مروا علينا
خوذوا جوابي ياهل الفطر الشيب
انتم تبون يسار والا يمينا
او دار ابو تركي ربيع المراكيب
قبل الصديق وربعنا الاقربينا
قطاعة السرح الموالي الى هيب
سلام يامروي شباة السنينا
ياروحن جرد السبايا جناديب
عساك طيب ياذرا المسلمينا
ابو العمى واللي قصر رجله العيب
اسمك ذهوب المال والله عوينا
عرق الندا لاصار مثلك ولاجيب
اللي يمارونك من الخاسرينا
مثل العمى يرقا بليا مقاضيب
يانور نجد إلى ضمن السنينا
عديت عنها موردين المغاليب
شامت لابو تركي طويل اليمينا
اللي حماها باالسيوف المحاديب
باالسيف خلا كل قاسي يلينا
لين الصعب يمشي سكينه وتاديب
يا شيخ والله ماظهر لك حتينا
يا اللي تخلي الشاه ترعى مع الذيب
ياشيخ ما تضفي جناحك علينا
تدمح لنا الزلات ياماكر الطيب
حنا لكم مثل العصا بااليدينا
خدامكم وانتم علينا معازيب
دار قزت باالجار عنها قزينا
نشوم عنها يا مهدي الاصاعيب
الدار مثل الدار للغانمينا
وربوع مثل ربوعنا والاصاحيب
وصلوا على المختار يا الحاضرينا
اعداد ماسار القلم با المكاتيب
