للجمع قلت العلم ما ردو اقوال
الصمت سايد والخواطر مريعه
وعجزت لا اكتم عبرةٍ حالها حال
تعوم ما بين الحنايا صريعه
الحق حان وعالي القدر له طال
وحلت على قلوب الجماعة فجيعه
عليك رحمة والي العرش يا خال
وبوداعة اللي ما يضيع وديعه
مؤمن وانا ادري كل مخلوق رحال
كبر الحدث يغلب عليَّ ما استطيعه
يا عين كبي حارق الدمع همال
ابكي عزيزٍ ماقعه بالرفيعه
ابكي على من لا صعب الثقل شيال
هو عون ربعه في زمان القطيعه
ابكي على من مقبله يشرح البال
نباه هو كيف الرفيق وربيعه
ابكي على من بالغلا يرخص المال
بين العرب لو مات يبقى صنيعه
ابكي على من فيه يضربن الامثال
علمه بفعل الغانمة بالطليعه
وانعي محارب من عليات الاطلال
من ساس من شاد الحصون المنيعه
من بيت ابوه الورث له ورث لعيال
ولا يالخلف عقبه تضيق الوسيعه
ابو محمد مدرسة علم لاشبال
سيرة فلاح ومفخرة للتبيعه
حكمة وحلم وعلم تبني بها رجال
ولا اظن عن نهجه تنحى طبيعه
عمره فناه بطاعة الله ما عال
مسعاه هدى المصطفى والشريعه
ويا الله بعفوك نزله خير منزال
آمين يا مجيب الدعاء يا سميعه
