هلا يا مرحبا ترحيبةٍ من خاطري تنساق
هلا باللي تذكرني بعد طالت به الغيبه
بعد ما أقفى يتل القلب تل الطير للمسباق
رجع يمي وأنا قلبي كفخ يمّه يهلي به
هلا يا مرحبا ترحيبة المشتاق للمشتاق
تحية من فقد خله وشافه دون يحري به
هلا يا مبعد الخطوة هلا يا جارح الخفاق
هلا يا اسباب جرح العاشق المغرم وتعذيبه
ترى ما غبت عن بالي وبالي من غيابك ضاق
هواجيس المفارق تقبل بفكري وتقفي به
اعذل القلب بغيابك ليا هاضت به الاشواق
واقول اصبر عسى الغايب يدور الوقت ويجيبه
أحبك حب صادق نابعٍ من داخل الأعماق
ملكت القلب ياحلو النبأ من غير ما ادري به
احبك حب وأسأل نجمةٍ في عالي الآفاق
يناجيها الفؤاد ولا تحققله مطاليبه
رجيتك لا تودعني ولا تطري عليّ فراق
دخيلك لاتزيد الهم والغربال بمصيبه
ترى الفرقا بعد حب الغلا هي علَّة العشاق
ليا جاء جرحها بالقلب ما تلقى تطابيبه
