صاحبي في نون عيني صورته مرسومه
وين ما لديت كنّه واقف قدامي
بارقٍ بالعين أخيله يمترح بغيومه
لا يصب الماء ولا يقطع رجاه الظامي
روح روحي راح قلبي لعبة لهمومه
طال صبري في رجاه وضاعت الأيامي
يا قمر نصف الشهر مدري شقيقه تومه
لو تغيب أيام عني ما قطعت أحلامي
طحت عندك طيحة ما أظن منها قومه
من خبر من طاح قبلي بالغرام وقامي
آه يا من ينشرح صدري لزين علومه
كيف تفجع بالغياب مولع بك هامي
لو عطيته من هواك القسمه المقسومه
كان ما شفته من اسباب الهوى منضامي
يا غزالٍ مرتعه في فيضةٍ ما سومه
مرعبه صوتٍ تفجر من سلاح الرامي
ارحم العاشق عسى اللي جابتك مرحومه
فيه لا يصدر بحكم الود صك اعدامي
نلت من يمناك طعن الخنجر المسمومه
طعنةٍ بالقلب يمشي سقمها بعظامي
واعذابي كم ليلٍ ما اهتنيت بنومه
كن جفني مع منامي في جدل وخصامي
فيك سجلت القصيده بالورق منظومه
ليتها تنفع معك يا قايد الاريامي
