يا الله يا منشي ثقيل الغماما
يااللي جميع الخلق لرضاك يرجون
ارجيك يا محيي رميم العظاما
تجبر عزا اللي بالمدامع يهلون
وش تنفع الونات ويا الملاما
ما ترجع اللي بالقبر صار مدفون
عز النواجم راح ريف النشاما
جاه القضا من ربنا والي الكون
عفت الكرى عقبه وعفت المناما
واسهرت بالونات ناسٍ ينامون
يوم أذن المذن وثمٍ أقاما
وقت العصر فالراجحي يايصلون
استدرجن عبرات عيني الزاما
شقت الجموع اللي يصلون يبكون
من ثم قفوا به هله والعماما
للقبر عزوة خالنا له يشيلون
عقب السفر حطوه وسط الظلاما
بالرحمة وبالمغفرة إله يدعون
ياالله عسى قبره جنانٍ كراما
وياالله عساه من اللواهيب مصيون
عساي أشوف الخال يوم القياما
يشرب من الكوثر ينابيع وعيون
خالي وأحطه فوق صدري وساما
ياالله عسى عياله بنهجه يسيرون
والله فلا ننساه عامٍ وعاما
إلين يفنى كل ما داج بالكون
ما همه الدنيا وجمع الحطاما
ولا هو من اللي للدراهم يعدون
يا ما عطت يمناه ياما وياما
تنحل عقدة من يجي إله مغبون
ريف الضعيف ومدهلٍ لليتاما
فعايله يشهد لها كل محزون
يسعى لجمع الشمل والالتماما
فقيدة يا كبرها كان تدرون
ما ذكر مخلوق عليها استقاما
الدايم الله والمخاليق يفنون
وصلوا عدد ما ناح ورق الحماما
واعداد من طافوا ببيته يلبون
على محمد سيد كل الأناما
إعداد ما سجل على الكاف والنون
