سميت باسم اللي يمد الخلايق
محدٍ غني عن مد جوده وعزه
وأصبحت أفكر في جميع الحقايق
اللي تصادفنا على كل حزه
شيٍ يليق وشي ماهوب لايق
مار الليالي كل شخصٍ تهزه
اللي ثبت يكسب جميع الطرايق
واللي تزعزع للمشاكل تكزه
هذا وأنا من بعض الأوضاع ضايق
اسوات من ضيقه بنفسه يحزه
بأسباب ناسٍ يشعلون الحرايق
كلٍ حصانه في ملزه يلزه
يجمع ذنوبٍ يعتبرها دقايق
مار الحقايق للمهالك تدزه
حقد وحسد وأعمال ظالم وبايق
يبلى رجالٍ عن فعوله تنزه
وإلى نصح يلحق فعوله لحايق
كم مسلمٍ شين الطبوع استفزه
يمشي ولا عاقة من الوقت عايق
الله عن الدنيا وأهلها يجزه
