ابتدي باسم الاله المستعاني
العظيم اللي له اخلصنا العباده
احمد المعبود في سر واعلاني
واحدٍ من يشكره بالفضل زاده
بعد هذا داعي الكلمه دعاني
كلمةٍ لاسباب داعيها افاده
كم قرينا كم سمعنا بالاذاني
مت غبن ياللي على الكذب اعتماده
ما علينا من فلان ومن فلاني
والدعايات الجديده والمعاده
ماشحنا بالحكي كاني وماني
والحسود يموت ويطول سهاده
من زعل من رضي من صابه جناني
حكمنا حكم الشريعه لاهواده
عندنا قانون رب المودماني
لا«لقانون المقنن واجتهاده»
حكم رب العدل واضح للعياني
به تعاملنا وعاملنا عباده
قالها اللي في بلاده ما يداني
وزن شعره فالوطن وتجرح فواده
يا وطنا يا فريد بكل شاني
يالكيان اللي تميز بانفراده
قلعة الدين الحصينه يا كياني
دونك الغالي وفاء يرخص نفاده
فيك بيت الله في اشرف مكاني
وفيك مسجد للنبي سن اعتياده
دين شعبك واحدٍ مافيه ثاني
مابك اللي غير الاسلام اعتقاده
فيك الانسان يتمتع بالاماني
الامان بكل معناه ومفاده
نفسه وعرضه وماله في ضماني
ترقد اعيونه اذا جر الوساده
الانسان بعز وحقوقه تصاني
في بلادٍ قادها للعز قاده
اهل العوجا عريبين المجاني
سادةٍ ما مثلهم بالكون ساده
الانسان بدارهم من حيث كاني
حر له كلمه ودور وله اراده
والله انه ما يذل ولايهاني
وان غداله حق بالشرع استعاده
يا بلادي يا مزايا يا معاني
يا مفاهيم التسامي والرياده
في هلك حب معه صدق وتفاني
حاسبين الموت من دونك شهاده
القياده للرعيه قلب حاني
والوفا طبع الرعيه للقياده
يا بلادي حقق الله الاماني
السعودي جت على غاية مراده
قالها اللي بك هرج قاصي وداني
ياكبر«حظ السعودي في بلاده»
جملةٍ ماجات عفوٍ باللساني
يكفي ان ادنى معانيه اشاده
يا ملاذ المستجير اللي يعاني
من كبير الضيم والهم ونكاده
فزعتك فيها بنكبات الزماني
مسح نكبة من يبكيه اضطهاده
يحفظ الله شجرة اطوال اليماني
في ذرها العز والنعمه زياده
الليال بظلها افراح وتهاني
كل ليل يمرنا انس وسعاده
