يا مرحبا بك عد وبل القنوفي
ترحيبة الارض المحيلة بودّان
انزاح عن رؤيا المحب الكسوفي
وإلا فلامن نقص في نعم الأخوان
اخوانك اللي ينصحون الكلوفي
وانجالك الوافين ذربين الايمان
الكل شال الحمل فوق الكتوفي
والحمل ما يشيله إلا هل الشان
لكن حبك مركزه وسط جوفي
يجري مع الدم الحمر وسط شريان
مافيه قلب بغير ود امعسوفي
اللي يكن القلب ينطق به لسان
الحمد لله زال همي وخوفي
وانزاح عن صدري عنا الهم واحزان
واشرق ضياء الفرحة على طول شوفي
واستبشرت بك واستفاضت بالالحان
بالقلب لو تسمع رجيف الدفوفي
يوم اعلنوا ساعة وصولك بالاعلان
اقسم باللي ما غير فيه امحلوفي
سلامتك ما تنتقدر بالأثمان
ندعي ونرفع للكريم الكفوفي
يطيل في عمرك ويجزاك غفران
ياعل صبرك بالثواب امخلوفي
اجهدت نفسك بالعمل وانت تعبان
تقوم لو ما تستطيع الوقوفي
وتشيل حملا ما يشيله بليهان
وتمشي ورجلك في عظامه سعوفي
ترقاء المعالي تعتزي في كحيلان
على غريمك يا ربيع الضيوفي
أقسى من الفولاذ في كل الأحيان
وأحد واقطع من حدود السيوفي
وإلا على الأصحاب هتاف الأمزان
اخو فهد يرسي بصعب الظروفي
قلب البلاد وسورها بلطف واسنان
عادل ما غيّر بالنقط والحروفي
يسير مع سير العداله بميزان
مثل البحر يرهب بيومٍ عصوفي
وليا هدا موجه جنوا منه مرجان
بالعدل نايف للجميع امعروفي
عسى النصر يمشي معه وين ما كان
عادل وفي حال المواطن يروفي
نرقد بأمان وسيّد القوم سهران
شيّال حمل الأرمله والضعوفي
بينه وبين الشعب ما حط بيبان
ألطف من الوالد بقلب عطوفي
الله وأكبر حب نايف للاحسان
نايف تعجز عنه كل الوصوفي
اسمه على فعله للأمجاد عنوان
كل المدايح فيه دايم تنوفي
من طيب فعله ما حصل منه نقصان
مدحي لنايف ما عليه الحسوفي
ما قلت مدحا فيه من غير برهان
نايف هو النايف زمام الصفوفي
اخو فهد نايف على كل ما بان
لو كل شاعر من جميع الصنوفي
يقول ويسيل من الشعر وديان
ما منهم اللي في مدايحك يوفي
لو ابدعوا بالقاف مع ضبط الاوزان
المدح لاجت سيرتك ما يطوفي
يقيف عندك وانت للمدح ميدان
الله يجيرك من خبيث الصدوفي
يا سيدي يا راعياً حق الانسان
عساك بالرحمن دوم امحفوفي
واجارك الرحمن من نزغ شيطان
