رفيقك الغالي منه لا تبرا
خلك معه في كل الأحوال ما جود
خلك معه في كل حلو ومرا
ومشاركٍ بأيامه البيض والسود
ترى الحياة أيام ما هي مقرا
والعمر مهما طال تاليه للدود
ودنيا الغنى ما ظن فيها مسرا
إلا العمل ومرافقه كل محمود
واللي على فعل الشكاله يورا
ترى المسار تعيب والحبل ممدود
ما هي سواليفٍ تدور وتمرا
مواقفٍ تبغى مصاريف وجهود
والهينة من طبعها ما تطرا
والطيب طيب ومن خصايل هل الجود
ما ينطح الماجوب خطو المقرا
اللي يحب الهون ويجانب الكود
بعض العرب بالنايبات يتزرا
ومع الزرايا حامل كل منقود
على الردى كنه بحبل يجرا
والله ولا رفقه منافق ومقرود
اللي على ربعه دوام يتحرا
والنار يلحقها بشعلة وبارود
للخير ما يأمر ويأمر بشرا
ومن طاوع الشيطان بالنار موعود
ماله من الله لو يحاوله مفرا
جميع منهاجٍ طمع فيه مسدود
وإلا الرجال أهل الوفا ما تغرا
والطيب ما هو يا هل العرف محدود
ومن عادة الطيب يسر ويضرا
علم صحيح وله براهين وشهود
