الفكر ما الومه ليا صار مشغول
والقلب ما الومه ليا صار خايف
الكل مشغول مواطن ومسئول
حتى وصل في حفظ مولاه نايف
والكل منّا يرفع يديه ويقول
الحمد للي فالمسلمين رايف
ترى التفاف الشعب هو خير مدلول
على المحبة والقلوب النظايف
واللي يحاول شقة الصف مخذول
فينا التلاحم صدق ما هو بزايف
حييت يا مروي شبا كل مصقول
على الشريعة ما يحكمك عجايف
يا فاصل ما بين قاتل ومقتول
يا عادلٍ ما بين كل الطوايف
يا بن الملوك اللي على العدل مجبول
في ظل سيفك يرقدن العفايف
وذراع من ينوي على الشرّ مشلول
وليا فعل ما حصّل الا الحسايف
ما عندنا جرمٍ يجي ضد مجهول
بيض صحايفنا بعرض الصحايف
يا سيدي والحق ما هو بماكول
وانت الملاذ لمن عليه الكسايف
يا رجل الأمن الأول اللي لك الطول
في حفظ الأمن وسعودتك الوظايف
والأمن في غيبتك محمي ومكفول
بقيادة اللي شال عنك الكلايف
أحمد على يمناك كالسيف مسلول
يشوف بالشدات ما كنت شايف
ومحمد اللي كل ما يكبر الهول
يجعل عظيمات المصاعب خفايف
دربتهم لين اصبحوا مثلك زحول
واصبح عليهم من سموّك وصايف
فعلك على طول الزمن يسبق القول
يادرعنا عن كل خاين وحايف
فتحت بيبان المضايف على طول
وفتحت قلبك قبل فتح المضايف
ورجليك تعبت من مسافات وحمول
ما ألومها هي والمعالي ولايف
عسى السلامة معك حولٍ باثر حول
وجعلك معافى يا ذرا كل خايف
