يا مرحبا يا سيدي من قلب واحساس وضمير
ومن شوق داخل مهجتي ما والله اقدر اكتمه
يا مرحبا ترحيبة فيها من اللهفة كثير
وفيها من الطيب الكبير اللي بجبينك ترسمه
غبت وتغربنا معك والشوق يانايف كبير
والقلب ينبض بك غلا يافزعته يا مكرمه
غبت ورجينا رجعتك والشاهد الله البصير
على احر من الجمر نرجي الاله ونزهمه
يا سيدي طال السفر والحبل من دونك قصير
والشعب صفوا في رجا راعي الوفا والمرحمه
كلٍ ترجى جيتك كبير شعبك والصغير
رجوى يتيم جايع يرجي كريمٍ يطعمه
ضاق الفضا في غيبتك والأرض تلفح بالهجير
والكل يلهج بالدعا يالله يا ربي تسْلمه
يارب سلم للوطن شيخ الوطن عون الضرير
من راسه اللي ما خضع للخلق لاطراف قدمه
يا سيدي دوك الولا والحب في اليوم العسير
من شعبك اللي مرخص عمره لك وغالي دمه
يا جابر ذاك الضعيف المستغيث المستجير
عسى الولي يجزل لك الاجر الكبير ويعظمه
يا سيدي ياللي تشيل بداخلك قلب كبير
عز الله انك للوطن قلبه وروحه ونسمه
وشلون ما يجمع على حبك كبير او صغير
وانت الصدوق اللي صدق قوله وفعله وقلمه
يا سيدي يكفي فخر انك على الامن الوزير
وانّا معك يا سيدي نقصي الحسود ونلجمه
يا سيدي في ظلكم عشنا على خير وفير
خير من الله سخّره لاهل النفوس المسلمه
ويا سيدي في ظلكم عم الرخا دار الفقير
ولا شكى العود الضعيف بها الزمان المظلمه
يا سيدي ما همّنا حتى لو المفرش حصير
دام «السعود» شيوخنا اهل الذمم والمكرمه
وشلون ما تشكي تعب واقدامك بخيرك تطير
ياهالرحوم اللي تسوقه للمساكين قدمه
طمنت هاماتك لهم يا سيدي وانت الامير
يوم انك اللي ما حسبت حساب جاه وهندمه
ويا سيدي في حضرتك عز الله انّا بالف خير
يا غايث ذيك النفوس الميسره والمعدمه
وترى قصيدي ما يعبّر كود عن شيٍ يسير
ولا انت وينك يالامير ووين شعرٍ ننظمه
ويامرحبا يا سيدي من قلب واحساس وضمير
ومن شوق داخل مهجتي ما والله اقدر اكتمه
