أنا ما أدري إذا هزت شعرها والجبين احتار
يبي يسمح يغطيه الشعر أو يكبح جماحه
وأنا ما أدري متى ما أدري تبي تلعب بي الأفكار
وأنا عارف عذابي بين يده وساطي جراحه
أنا ما أدري لكن الله خلقها والكريم اختار
عطاها الله مكنون الجمال وسادت الساحه
وأنا ما أدري تماري بالسهوم ولحظها البتار
برمش عيونها جيشٍ شجيع بكامل سلاحه
وأنا ما أدري تغلي صدها والا جفا وإنكار
لكنه كيف ينكرني وهذي باقي رماحه
وأنا مدري إهي تكذب وتخلق كل يوم أعذار
لكني غصب أصدق دام قلبي عاف نصاحه
مادام إني كذا بأصبر.. تصدق ما معاي خيار
رضيت أو ما رضيت القفل بيدينه ومفتاحه
وما أدري لا متى صبرك ياقلب شب وسطه ونار
أخافك ما تطوّل والسدود تصير منباحه
وأنا ما أدري اهو حظي كذا والا الزمن دوّار
ومثل ما ذقت كاسك يالعنا.. لي كاس بالراحة
أنا ما ادري متى ياتي وعدها والحياة أسرار
ومدام الأمر بيدين الكريم النفس مرتاحه
