اليا طلع نجم اليمن قمت أخيله
وبدلت عن جنب الحليله رقادي
يا سهيل ياليتك تمهلت ليله
لو كان بقعا ما عليها قعادي
قدامك العربان تمشي محيله
والعمر صيوره ما غير النفادي
يا سعد عطني من شراب الثميله
واحرق لي البن الخضر بالجوادي
ابيه يظهر من ضميري مليله
على ثمر قلبي مظنة فوادي
والكيف عقب سهيل انا ويش أبي له
جعل الدلال ونجرها للنفادي
يا ويلدي مبداه راس التليله
يرقاه لو الرجم عسر وسنادي
ويا ويلدي زاد البيوت الوخيله
ويعشي الجيعان لو ماشي زادي
ويا ويلدي مثل السيوف الصقيله
تقول حر ضاري للهدادي
ويا ويلدي يبتع بليا دليله
تقول سبع ضاري بالمعادي
يومي لهشال الخلافي شليله
وان عارضنه قاطعات الرهادي
اتلا العهد به يوم زين مشيله
شالوه عني في هدوم جدادي
عسى صدوق المزن يسقي مخيله
يسقي القليب اللي على جال وادي
يعطيه لين يعيل بالما مسيله
حتى الوضيع اللي عليها يرادي
عليه في العصر يرجح ظليله
والصبح يزغي عنه في البراري
