يأهل الهوى قلبي تمكّن به الياس
ما عاد باقي للرجاء فيه ذره
ما عاد باقي للرجاء فيه مقياس
قفّت صعونه ليتها مستقره
هذي ثلاث سنين والفكر منحاس
زادت على قلبي بضر ومضره
أسهر بليلي بين همٍ وهوجاس
والفكر هاجوس الليالي يمزه
وأفرح ليا جاني من النود نسناس
يطفي لهيبٍ بالحشا زاد حره
والقلب يجرع صافي المر في كاس
كاس الهوى لو قلت ما قلت مره
سبّه وليفٍ علق القلب يا ناس
ليته تعدّاني بخيره وشره
حدّد مكانٍ بالمعاليق حساس
ومكّن صوابه يوم حدد مقره
صوب سهومٍ له كما سهم جساس
وأقوى غدر من شهم جساس مره
وأقفا وأنا من لوعة الشوق محتاس
ما عاد باقي كود ثوبي وأقره
عقبه ترى قلبي من الشوق منداس
وعزّاه يا قلبٍ لجا فيه حره
وأقول يا سيد الغنادير لا باس
تستاهل اللي صان حبك وسره
دوّنتلك مضمون شوقي بقرطاس
ولا عاد لي فالحب يا زين كره
