يا طير مادام لك جنحان وش بك حزين؟
ما تاخذ الريح وتخلي عذاب الطمان
ابعد عن الأرض وأهل الأرض والشامتين
يا لين ما فيه شيءٍ من أثرها.. يبان
خل الحزن للحزين اللي عذاب.. السنين
موجود في داخله من يوم عمره ثمان
يا طير شفني وتدري انك.. ابنعمتين
تروح بعد الفجر.. وترد قبل الأذان
تشكي وتبكي لأنك فاقدٍ.. ريشتين
اجل وش يسوي اللي فاقدٍ له زمان
خل العنا والليالي والبكى .. والأنين
للي ضروفه دهنه ياالله المستعان
والا أنت طيرٍ يقسيك الزمان.. وتلين
من شاب ريشك تنقل من مكان إلى مكان
تطير فوق الحقول اللي شمال ويمين
وتداعب الورد.. والنعناع.. والقحويان
عشك بنيته وساقك يمه اكبر حنين
ما به يدينٍ تشدك وانت مالك عنان
يكفيك من جاري الماء قطرة.. وقطرتين
ويسد جوعك قليل الزاد عدل وظمان
يا ناعم الريش عندك وش يشيل الكنين
ما تترك الهم لاصحابه وساع البطان
تصدق اني عجزت القى.. رفيق يعين
انادي الناس ويضج بنداي المكان
حتى أقرب الناس حدت من عطاه السنين
اقول ياقلان ويرد الصدى يافلان
ياالله يا الله يا راضي.. عن المذنبين
إليا اقلعوا عن خطاياهم وفاضوا حنان
يا الله وأنا عبدك اللي جاك دمعة وعين
تحلها يوم عقدها عليَّ الزمان
