من لا جراله باول العمر هده
تاليه ما يمديه لاقل حيله
يفعل سبب والا المقدر مرده
واصلك يا مخلوق لوما تجي له
الطيب دونه شاحةٍ مجرهده
تثني مرام اللي عزومه ذليله
مايدركه من طاب خاله وجده
ولا هوب ورثة ميتٍ ينتمي له
يقوله اللي بيح الصبر سده
لين اشتكى بالقلب همٍ يشيله
له غايةٍ عنها الليالي تضده
من صوبها قل احتياله وحيله
لولا غريبات المعاني تشده
يدله بهن تالي نهاره وليله
عاف المذاق وعاف نوم المخده
ماكنه إلا فوق حام المليلة
لاشك عينه للفرج عقب شده
يفزع له اللي ساق نو المخيله
يجودله باللي يبيه ويوده
حب الشرف ورقاب راس الطويله
متاع وقتٍ في ليالٍ تعده
حيث الامن لاشك فيهن رحيله
يالله ياللي عمنا جود مده
اغفر خطا عبدك وسمّح دليله
وصلوا على اللي سيرته مستمده
جت بالكتاب اللي دعا للفضيله
ما ناض براق المزون المسده
وما هل من زبر النصوب الثقيله
