واطيري اللي لا برق الريشي جذاب
بالقاع وان طارت يخيب تعبها
لا شافهن في جانب الروض ما هاب
حول على اللي نفضت له غلبها
بالكف ما يكفخ وللصيد قصاب
كم خارم منه اقرشت لا ضر بها
غدى وأنا أومي له على راس مرقاب
طلعه ورا برقا بعيد طلبها
بيني وبينه زولت قور وهضاب
هف وهفا بأرض قليل عربها
ونخيت صدقاني عريبين الأنساب
وكل تحزم واستعد لطلبها
وراحوا على الحرده يرمون الأسباب
في ديرة بالقيظ تابس قربها
وجوني وعزوني عن الطير حطاب
واستقنعت نفسي وهون غضبها
قالوا لقينا جثته بين الأطناب
تلعب به الورعان جملة لعبها
لاجا القدر ما للفتى عنه مجناب
ياما فجع ناس وناس نكبها
وياما خذا شيخ تداريه الأجناب
والا الطيور تموت ما أحد حسبها
مثل الخريش وابن حثلين وعقاب
لا طار عن بيض المفارع سلبها
يوم الفعول برمح وسيوف وحراب
ومشوك يشظى العظام وعصبها
هذي علوم يا عزيزين الأصحاب
في طيرتي واللي جرى من سببها
