الله من قلب تبيح كنينه
مير الحياة أساسها صبر وايمان
الموت درب كلنا سالكينه
والموت أمر لازم بعمر الانسان
يا رب ترزقنا ثبات وسكينه
وضاعف وزد يا ربنا اجر سلمان
يا مستجيب لمن رفع لك يدينه
انزل على احمد منك عفو وغفران
واللي شكى لله ربي يعينه
والله على الاحسان يجزي بالاحسان
مقدر ومكتوب زينه وشينه
وهذا القدر يمشي بتدبير رحمن
واللي قضاه الله يأتي بحينه
يأتي القضاء ما فيه زود ونقصان
لله حكمه.. يالعيون الحزينه
مير الحظيظ اللي صبر عند الاحزان
كم واحد تذرف من الدمع عينه
ومن رحمة الله يرزق النفس سلوان
تكدرت كل الرياض المدينة
وتكدرت معها مناطق وبلدان
عند ابتلاء العبد يظهر يقينه
والموت حق وبذل الاموال برهان
سلمان يا مير القلوب الامينه
هذي مواساة الحبايب والاخوان
يا عونة الله والامور بيمينه
اليوم ودايم دوم.. يا عالي الشان
واحفظ على المسلم صلاته ودينه
واجعل له التوفيق في كل الاحيان
يالواحد اللي كلنا مرتجينه
يا ربنا تحسن عزاء آل سلمان
