يا الله يا عازل نهارك عن الليل
يا الله يا معبود يا موحدينه
تجبر عزانا في سيوف مصاقيل
سيوف غوالي من سيوف ثمينه
غابت نجوم كنها الجدي وسهيل
فهد تليد المجد.. واحمد حتينه
انجال زيزوم الرجال المشاكيل
اللي من المعروف تندى يدينه
سلمان نبراس الرجال الحلاحيل
رمز الرياض.. ونجد يا عارفينه
العام حزنا على موفي الكيل
فهد فقيد الشعب موته غبينه
واليوم حزّنا على فارس الخيل
أحمد عليه نفوس الامه حزينه
أحمد زعيم المعرفه نافل الجيل
ياما لفعل الخير تنفق يمينه
يبكيه من قلت عليه المحاصيل
اللي من الايام مشتال دينه
ويبكي معاق حاصرته الغرابيل
قايم على بلواه طيلت سنينه
ويبكي على موته ضعوف ومراميل
ويبكي اليتيم اللي فقد والدينه
موته مصيبه هولها يتلف الحيل
وأميرنا سلمان ياالله تعينه
ويوم الفتى ما عنه صده وتاجيل
مكتوب والمكتوب ياتي بحينه
والحزن ياخذ عدة ايام ويزيل
والصبر عنوان العقول الرزينه
ياالله يامرسل على الرسل جبريل
يا خيرٍ كل الملا مرتجينه
عساه للجنة طريقه تساهيل
مع من كتابه ياخذه في يمينه
وصلاة ربي عد ما يجري السيل
على رسولٍ منهجه تابعينه
