الله الباقي وغيره مصيره للزوال
كل حيٍّ لو يعمّر مرده للرحيل
حكمة الخالق ونومن بها في كل حال
ما عن الايمان فيما قضاه الله بديل
قوة الايمان ميزان لعقول الرجال
والمصايب علةٍ طبها الصبر الجميل
المصايب تختلف من خفاف الى ثقال
كلٍّ بمكيال عقله حسب عرفه يكيل
مار عند مصيبة الموت ماينفع جدال
الأجل وقته محدد.. ورده مستحيل
ياخفيّ اللطف يا عالم كل الأحوال
نلتجي لك بالدعا.. يا عزيز ويا جليل
تشمل بعفوك ورحمتك محمود الفعال
تجعله ياخير مُنزل بجناتك نزيل
أحمد اللي به من الطيب جزلات الخصال
من سلالة سادة العدل.. والفعل الجزيل
أحمد اللي همته عانقت شم الجبال
سيرته وأعماله الخيّره نبراس جيل
شيّد صروحٍ من المجد باكثر من مجال
مشهد أصغرها على فضل أبو فيصل دليل
جعلها له في موازين حسناته تشال
في نهار فيه خير العمل نعم العميل
والمقام أكبر من اللي بذهني من مقال
ما يحصره من قصيدي كثير ولا قليل
وأفضل الأقوال صدق الدعاء والابتهال
للعظيم اللي موازين عدله ما تميل
ياعظيمٍ منك الامهال وإليك المآل
ياجليل الملك ياجالي الهم الثقيل
ارحم المفقود.. واحفظ كريمين السبال
احفظ الاشبال واللي لهم ظله ظليل
ماعلى غيرك لخلقك ملاذٍ واتكال
جعل حاكم نجد له بالسعد عمرٍ طويل
واجل حزنه مثل ما اجليت الاحزان الثقال
عن صدر يعقوب.. وأيوب بالصبر الجميل
