يا الله ياللي معتلي في جلاله
يا خالق اجيال ويا مفني أجيال
تجبر عزا رمزٍ فقد من عياله
رمزين، هز فراقهم كل رجال
وتجبر عزا أمٍ عفو ربي تساله
في قلبها من صاطي الهم ولوال
فهد رحل واحمد بعمره مشى له
تدبير من بيديه تصريف الآجال
يا سيدي سلمان والعبد ماله
عن دبرة الخلاق في كل الاحوال
يالمؤمن الصابر على ما جرى له
يالمحتسب رغم المصايب والأهوال
لوما جرالك صاب راسي جباله
لقيتها من جاير الكود تنهال
واللي على الله همته واتكاله
عند الشدايد يلهمه زين الأعمال
ترى رجا المؤمن يزيد احتماله
وانته على البلوى تجودت بحبال
واحمد ترك دنيا الفنا لا محاله
نرجي له الغفران مع طيب منزال
احمد ثمر بيت الوفا والشكاله
من دوحة يوجد بها فَيّ وظلال
خلقه كريم وفيه طيب وسهاله
ومن دون وجهه يبذل الحال والمال
من مدرسة سلمان راع العداله
زيزومها اللي للثقيلات شيال
من حَب يفهم في حياته رساله
وش يفعل المعروف مع طيب الافعال
يجي لقصرك يا مديم الجماله
على فئات الناس بالوان واشكال
ويلقى جوابه قبل يطرح سؤاله
ويدري عن اللي قيل في ماض الامثال
من يزرع المعروف يحصد بداله
حب البشر، والناس ماهم بجهال
