يا طيري اللي راح في تالي الصيف
جاته صواديف المنايا سريعه
طير السعد بحر الندى مكرم الضيف
وافي إلى بار الوديع بوديعه
نادر ولا له في النوادر تواصيف
هذاك والله ريف قلبي ربيعه
يا الله يا منشي المزون المراديف
تجعل مقره في جنانٍ رفيعه
وتجبر عزا اللي دمع عينه تهاتيف
عينٍ من الفرقا يا ناصر وجيعه
العين تبكي مع كثير التحاسيف
ضاقت صحاري نجد لو هي وسيعه
أجاذب الونه بروس المشاريف
والأمر للوالي وحنا نطيعه
واللي كتب في اللوح ما عنه تصريف
لو كنت في ذيك البروج المنيعه
والموت والآيات للناس تخويف
والموت سنه والمفارق فجيعه
وانا فقدت اللي بيمناي كالسيف
لو إنها للبيع والله مابيعه
مير الليالي ما تجيلي على الكيف
مقدر الأقدار رب الشريعه
وختامها عد المزون المراديف
عساه في جنات عدنٍ رفيعه
