* الرطب وصل لكن العجلة من الشيطان أثقلوا خلوه يرخص ترى ما طيّر السعر إلا طفاقتكم!
* وين راحت المراكز الصيفية اللي خرَّجت ثلاثة أرباع المبدعين الموجودين في الساحة الآن. المسألة تراها ما هي لوحة مكتوب عليها مركز صيفي؟!
* في يوم هالجمعة المباركة نايم الين حول ما تقام الصلاة وآخرتها فارش غترته على الرصيف ويصلي معهم الركعة الثانية.. وفي الأخير معتبر نفسه مصلي الجمعة الله يخلف عليك وأمثالك!
* البطاقة المدفوعة الثمن مسبقاً ما نشوف عليها سوق شكل الناس يحبون الخساير وودهم بفواتير تجيب الجلطة..
يعني وش فيها لو تدفع 200 ريال وتقتصد في اتصالاتك والا جيدين في الزبرقة ثم شق الجيوب والتشكي!
* وعلى طاري الاتصالات والهاتف.. ترى محلات بيع الجوالات لعبوا فينا هبَّلوا بعيالنا وحريمنا والمهفات من رجالنا كل يوم شكل ونوع وفي النهاية اللي تشتريه بألفين تبيعه بمئتين وما حد لا يراقبهم والا يقول لنا شغلهم صح وإلا نصب عينك عينك!
* الموظفون اللي يدعون أنهم ملتزمون ومنضبطون تكشفهم دائماً الاجازات الصيفية من يوم تعطل المدارس والربع يعودون مثل غيرهم يعني ترى ما ضبطهم الا توصيل عيالهم وحريمهم للمدارس والا تراهم أردى من غيرهم.. أحسن ما في الموضوع ان المواقف بدت تفضى بداية الدوام بساعتين ونهايته بساعة!
* ماش ربع المرور مصرين على نقطة تفتيش طريق المدينة.. عطلوا الناس بالزحمة ووتروا اعصابهم بالمراقبة اللي زادت عن حدها .. أقول ياليت تعرفون هالجهد لمطاردة أباطرة التفحيط اللي عيني عينك وفك اختناقات طريق الملك فهد وحويسية البطحاء!
* معارض السيارات تشتكي من عالمية الشريطية كل الجنسيات صاروا شريطية ومحرِّجين وعساك ما تدخل الساحة أو تمر جنبها لو بالغلط الا بيعوك سيارتك حتى لو فيها عيالك.. يا جماعة علمونا هل هذا مطابق للأنظمة والا لازم تطلع لنا حالات مثل عصابات النشل عشان نفتح العيون ونوعي الناس لخطورة الأشياء.
| 
