إيه الهوى في عالمه جرح وطعون
واحلام لكن في النهاية ممله
يا كنت أخافه وأزرق الدمع مصيون
واتوسله واقول ياحب لله
وهالحين لا راضي ولانيب ممنون
أسير مدري.. في خفايا سجله
ماهو حكي.. والا وكالة يقولون
القلب تايه ما لقى من يدلّه
بصمت أعاني واحسد اللي يغنون
ما جربوا عقب الغناة المذله
يا عاذلي.. صاحي ولو قلت مجنون
يكفي.. كلامك زوّد الطين بلّه
دعني أعيش بهمّ واحزان وشجون
كل المآسي والعنا فدوةٍ له
الحب عندي غير.. صادق ومصيون
إن قلت وينه.. قلت هذا محله
ياللي تقول الحب وشلون.. وشلون
أقول لك.. بعض السوالف ممله
