يأمل قلب فطنه شلعة الطير
ما كن ماضي لي جمايل نساني
ان لا يع الخضرا ولا له مواكير
ما قال أنا ليه خوي وتناني
فطن عليه مراح روس الشناضير
وعشاه من بيض الثنادي سماني
متى يا حجي يوم نرشد على خير
نبي نفارق سريها والفداني
متى نجي للشيخ حامي المقاصير
ريف الهجافا كان شان الزماني
متى تزوع اسلافنا والمظاهير
العصر فَيّ مشيّدات المباني
ومقامنا بين الفياض المخاضير
ويبدا علينا من بعيد وداني
ومتى نسوي ضيفة للمسايير
اجناب واقراب وبعضهم عواني
ونبي وظيفة ناسعات المسامير
فرحان يدوبك عندهن بالأواني
واليا اعتلوا شيب النواصي المناعير
الجوخ يزها ملونات القطاني
في ساعة غارن وراضن شنانير
والغلب عند معربات الحصاني
نوبٍ نجيب الفود روس الخواوير
صفر وشقح وخالطه ويضحاني
ومره يجنك بالنشاما مصادير
متفقدات مفلقين اليماني
مره عليهن جايبين المغاتير
ومره يجن ماغير هز العناني
