آه يا حالٍ تعذب من شقاي
من ثمان اسنين همه زعزعه
من عنودٍ ربعت داخل حشاي
قلبي اللي صار سبحه باصبعه
قاسيٍ قلبه وعاند في جفاي
وإن طلبته مطلب زاد دلعه
لا يبعدني ولا يقطع ظماي
هقوته قتلي وهذا مطمعه
جاه قلبي غصب ليته من عطاي
جر عرقه لين بالهجر قطعه
قلت أخذت القلب يا داي ودواي
قال اخذته بالكفوف ارعرعه
قلت رد القلب قال اشوي جاي
قلت له طلبه طلبتك رجعه
مير هذي غلطتي هذا خطاي
يوم سلمت المفاتيح أربعه
أول المفتاح قلبي واعناي
وفكري الثاني وحالي لوعه
وأخر المفتاح روحي يا مناي
بالهجر والصد مالك منفعه
حبكم يا زين ماشي في دماي
فالعروق اتوزعه وتجمعه
ما حصل يكفي ترى مالك وراي
لا تعذبني وغيرك ما اسمعه
فيك أفكر من خلايه في خلاي
منك أقاسي الجرح همه ووجعه
دوك عيني خاوت النجم بسماي
والمطر والسيل دمع تدمعه
