كل شي يجوز ان الغصايب تجيبه
غير حب الخلايق ما يجي بالغصايب
كم حبيب تحبه وانت غيرك حبيبه
مثل قلبي وكاشف غرته للهبايب
يوم عرض وفيني لوعة وفيه ريبه
معه من جملة اوصاف الحسن كل غايب
ما يشوف المبرّق فيه عيب يعيبه
غير قتل البري اللي من الذنب تايب
ادعج زوّد المجروح فرقا طبيبه
ما يحن القلوب ولا يخاف العقايب
واصل في جفاه وقاطع في قريبه
والغلا يودع الاجناب مثل القرايب
سامح الله خطاه وحلله من صويبه
دون جاهية فيها وجيه وطلايب
يوم كل آدمي ما ياخذ الا نصيبه
المحبة نصيبه لو نصيبي مصايب
ومن يقول التجافي لا تعده مصيبه
امس وانا شباب وتالي الليل شايب
صد عني بأعاجيبه ولطفه وطيبه
صدة اللي توارى تحت عوج النصايب
بس لازلت احبه في لقاه ومغيبه
كثر ما شفت في سكة هواه العجايب
كثر ما في ضميري من جروح عطيبه
اعطبتها صواديف الدهر والنوايب
كثر ما يلحق الغاوي شبابه مشيبه
في رضا مستريح ما نشد عن حبايب
كثر ما مر بالعاشق ظروف صعيبه
يتبع الظن فيها وأكثر الظن خايب
يحسب ان الغصايب كل شي تجيبه
غير حب الخلايق ما يجي بالغصايب
