يا سليمان اشهد ان المصيبة مره
والخواطر من شديد العنا مكسوره
وان فقد الادمي للجنين يضره
قطعةٍ من روحه الغالية مبتوره
واشهد ان الحزن موجع كفى الله شره
للقلوب اللي بحب الضنى مفطوره
واشهد انه ما يطيقه ويقوى حره
من فقد غاليه لو دمعته مستوره
واشهد ان الصدر ما تفترك به ذره
والفضا به ضيق حيث الفقيدة نوره
والدموع تهل مثل المطر منثره
كنها من كبر هول الخبر مذعوره
ان نست قيد الحيا واسرفت مضطره
وحفرت بوجيهنا دربها معذوره
الله يعينك وياجر هاك المنحره
ام نورة جعلها بالصبر ماجوره
ومن بقى لك من عيالك يطولك بره
والبريرة عادةٍ عندكم ماثوره
ومن تصبر واحتسب (عند ربي) سرَه
حيث نفس المسلم بصبرها ماموره
