ماقلتلك ذا الوقت قاسي ودوار
تشين لو زانت ليالي دهرها
هذا أنت.. غبت وفرقت بينا اقدار
جت منك والأحلام كل خسرها
من عقب مشوار بدينا به صغار
نرسم لأمانينا من أحلى صورها
عمر مضى عشناه في حلو وامرار
أيام وسنينٍ عطتنا ظهرها
ياما حصل فيها من افراح واسرار
بالله قلي منهو اللي كسرها
انت السبب يا مرخص كل ما صار
احساسك الميت هو اللي دمرها
يا شينها لانهدت احلام كبار
صدمه على نفس تزايد سهرها
نفس معودها على انواع الاكدار
على الشقا وقت العنى كم عسرها
ارغمتها بالصبر واجبرتها اجبار
تنسى لمن خان العهود وغدرها
فلا تطري الرجعة ولا تبد الاعذار
يكفيني اللي صار لي من كدرها
قد قلتلك ذا الوقت قاسي ودوار
هذي تصاريف السنين وقدرها
