مازاد عن حده محدد ومخطور
مخطور لو قلبك نبيهٍ وصاحي
الى سمعت.. او شفت حاذور.. حاذور
مالك عن أهل العرف واهل الفلاحي
رفيقهم دايم على الحق منصور
مجنبين أهل البكا والنياحي
ما نبت على عرف الرديين مجبور
اللي تزيد جروح قلبك جراحي
ترى القناعة كنز.. يا سامع الشور
كم واحدٍ وصل الثريا وطاحي
الزود مثل النقص والكل مكبور
والطير أبو مختار فل الجناحي
انا مثل غيري لي احساس وشعور
لا لا تقول الوقت.. ولاّ وراحي
الرابح اللي ما عرف شاهد الزور
مثل الجبل شامخ بوجه الرياحي
مرت عليه عصور.. وعصور.. وعصور
مضرب مثل والوصف علِّق وشاحي
ما غرته دنيا كما العقد منثور
ما يتبع بدنياه غير المباحي
اللي بفعل الطيب والخير مذكور
ما همه اللي يشهرون السلاحي
له بالشجاعه والكرم. سامي الدور
أخيل برقه.. وين ما البرق لاحي
له بيرقٍ دايم معزز.. ومشهور
وجهٍ عطاه الله قبول وسماحي
