الحمد لله رب الخلق حاكمها
الواحد اللي على خلقه ضفا جوده
على السلامه مشاعر ود نرسمها
بابيات شعرا على الاوراق معدوده
اسمى آيات التهاني لك نقدمها
يا قايد الامن فخر الامن وجنوده
أعضاك من كل شر الله يسلمها
وتعود سالم ونسعد في لقا العوده
ماجور يابن الوطن حامي محارمها
اللي بذل للوطن جهده ومجهوده
نايف هل العز ومقوي عزايمها
كل الخصال الحميده فيه موجوده
كم ليلة ما رقد والشعب نايمها
فعائله يشهد التاريخ محموده
يطور الامن واجهزته ينظمها
لأجل الوطن والمواطن كرس اجهوده
يقمع هل الشر واهل الخير يكرمها
ضو الفخر والكرم يقدح من زنوده
ابوه عبد العزيز ارسى دعايمها
نوٍّ على ارض الجزيرة ذعذعت نوده
هبائب النصر هبت له نسايمها
من يوم غنى وحث زناد باروده
مزون غيث تهمر من مقادمها
وبلٍ يغيث القلوب بزأرة ارعوده
صقر الجزيرة صقر لصقور سلمها
على التقدم والامن اليوم محسوده
الله يكتب له الجنه ويقسمها
هيبة وطنا وعزه ثمرة اجهوده
يالله لعل افضل اعماله خواتمها
وافضل ايامه لقا الرحمن معبوده
