بين الرجا والياس والشك والريب
تقرب مسافاتٍ وتبعد مسافات
وبين الخطا والصح والعيب والطيب
مسافةٍ تفوق كل الحسابات
يدريبها اللي ما ظن له تجاريب
وله مع ظروف الوقت صوله وجولات
ما يارد إلا فوق عذب المشاريب
وله مع رجال العرف لزمه وقفات
ولا صد وجهه عن وجيه المواجيب
ولا طمن الهامه ولا شك فالذات
ولا هوب للاصحاب شاذب عراقيب
ولا قدم أعذاره تملص وحيلات
لا شك هد ويا كثار العذاريب
مال الردي عند المناعير شرهات
أهل الردى للطيب ما هم معازيب
عليهم اثقل من طميه وابانات
ما ينطح الواجب ضعيف لهناديب
ولا مدة الجزله كفوفٍ ابخيلات
والبيت من غير العمد والمناسيب
ما ينبني يا هل العقول الرزينات
