نشرنا في عدد الاسبوع الماضي لغزاً كتبه الشاعر منصور بن عبدالله المجيدل من محافظة الرس، وكان نصه:
ويش ورع ياملا فوق بطن امه يسيري تبكي امه والعرب ما ترى فعله خطيه الظهر محنى واشوف الجسم مبري صغيري يقضي ايام العمر كلها روحه وجيه |
وكالعادة وصلتنا عشرات الحلول التي صح منها من حيث شروط النشر الخاصة بحلول اللغز الحلول التالية:
يا هلا يا مرحبا كل ما الطاير يطيري بالجزيرة نفختر بالمواصل هي وفيه حل لغزك للربابة يجي معها سميري لا تحرك قوسها قمت تسمع له وحيه |
علي رشيد الرشيد / رياض الخبراء
يالمجيدل.. حل لغزك يجيك من المطيري ومع جواب اللغز.. نرفق لكم شكر وتحيه استمع مني جوابه عسى فالامر خيري لغزكم قوس الربابه ولا يخفى عليه |
زهران عون الله المطيري / بريدة
مرحبا بالشاعر اللي للمراجل هو يديري لك تحية عن جميع اللي قرأ لغزك هديه لامشى قوس الربابة ما يتعبه المسيري يالمجيدل دام ذا لغزك سهل حله عليه |
عبدالاله حسن القعيري / المزاحمية
افهم الالغاز ويحلها فاهم شطيري مهما صعبت ما ظنها تصعب عليه وقوس الربابة وصفكم يالشاعر يمه بشيري ويد العازف تلعبه بفن ورويه |
عبدالله بن سويلم عتيق الشملاني العنزي
يا هلا بك يالمجيدل عدد طيرٍ يطيري يا هلا عد الزهر والرياحين النديه وانت يا قوس الربابة اليا جرك خبيري يطرب السامع بنغمات والحان شجية |
محمد بن صالح المجماج التميمي / الرس
من بلد خرخير اقول الحل واثق ما استشيري وارسله لاهل الجزيرة مع سلامي والتحية لغز منصور المجيدل على الشنه يسيري قيوس بفنون الربابة يشيل السامرية |
خليف الحربي / الخرخير
مرحبا ترحيبة قلتها لك من ضميري مرحبا بك عد ماهل وبل العقربية انت تنشدنا عن الورع بالطرق العسيري بس حفا نعرف القوس والخيرة خفية |
عطا الله بن سليمان العطا الله / الزلفي
مرحبا يا كاتب اللغز يالعقل البصيري يالمجيدل لك تحية من القاري هدية والورع قوس الربابة وله قدر كبيري زينها مع شبة النار برياضٍ خلية |
متعب الشابوش الروقي / عفيف
يا الله اني طالبك سهل الامر العسيري ياولي العرش يا عالمٍ في كل نيَّة لغز منصور المجيدل به افكاري تحيري الربابة فوقها القوس والنية حطية |
أشرف محمد البيومي
مصري - مقيم بالرياض
الجواب اللي تبونه يالربع ماهو عسيري يالمجيدل خد ردودي يا رفيقي والتحيه قلت انا قوس الربابة غير هذا ما يصيري جره النشمي وربعه هم يشيلونه سويه |
محمد بن عبدالعزيز الخنيفر
يا سفينة شعرنا واصلي درب المسيري لا يعوقك بالفضا مركبٍ حاله ردية الربابة لبست قوسها لجلك حريري حلقي به فوق خارج نطاق الجاذبية |
فهد الجروان /الزلفي
يالمجيديل وان سمعت القوس فوق امه يغيري الربابة قوسها تسمع له لحوناً شجية وما حلا صوته وهو بايد رجَّالٍ خبيري ولك عبر تراثنا كل تقدير وتحية |
منير خلف الرشيدي / عنيزة
