يا الله يا اللي عالم غيب الاقدار
وامرك على كل المخاليق داير
افرج لقلبٍ ذاق ويلات وأمرار
وعين تهل الدمع منها عباير
آمنت بك يا الواحد النافع الضار
يا عالم المكنون وسط الضماير
اجبر عزانا يوم قصاف الاعمار
روَّح بسارة وامها مع بشاير
وأخد وليد وجدته شمعة الدار
وامه توفت وامر الاقدار صاير
ست نفوس روَّحن وقت الاسحار
يا الله أجرهن عن لهيب السعاير
واسكنهن بروضة وجنات وانهار
في منزل ما فيه حزن وخساير
دار النعيم اللي يفوز بها الابرار
وتغفر كبار ذنوبهم والصغاير
ويا الله تشفي من نجو عقب الاخطار
واليوم صاروا فوق بيض السراير
يا منجي ابراهيم من لاهب النار
وعافيت جسم ايوب عقب العزاير
واسألك يا منزل من المزن الامطار
تجبر عظام اللي عليها الجباير
واعط الشفاعة من توفو وهم صغار
يوم القيامة والصحايف تطاير
يوم الحساب اللي تزوغ به الابصار
ومن شدته يصبح به الفكر حاير
هذا وصلى الله عدد نبت الازهار
وعداد ما غرد على الغصن طاير
على نبي خصَّه الله واختار
شفيع خلقه يوم كشف السراير
