يا سيدي من فضل ربي سلامتك
تسلم لنا يا طيّب الراس نايف
يا لنايف العالي سماء المجد هامتك
يا متعبٍ رجلك بوقفة وقايف
ما ألوم رجلك لو شكت ثقل قومتك
حملك ثقيل ولا بحملك خفايف
اتعبت رجلك لأجل دولتك وأمتك
جهدك ومجهودك يفوق الوصايف
ليثٍ على الأمن السعودي مهمتك
يا باذلٍ جهد له الكل شايف
طلعك بعيد وفي سماء المجد هومتك
يا مشيدٍ صرح بروس النوايف
أمنٍ شمخ في قمة العز قمتك
قمة فخر قامت بجهد وكلايف
من فضل توجيهك ورأيك وحكمتك
أمن وأمان ويامن الخوف خايف
يا مطوع الكايد بفعلك وكلمتك
بالشرع والسنه وحد الرهايف
للدار وأهل الدار مخلص بهمتك
عينك بشعبك بالسنين العجايف
دايم بدرب الخير للشعب يمتك
يالوافي الموفي بعدل ونصايف
زرعت حبٍ في قلوبٍ وضمتك
حب وولا ياللي على الشعب رايف
نبع الوفاء نبع الكرم في شهامتك
ينقاد فيك الشعر قود العسايف
وختامها يا أمير دامت سلامتك
تسلم لنا يا طيب الراس نايف
