طوارف ليل مع حمرة غروب..ورحلة العطشان
طويلة حيل يالغالي..دروب تعجّز الوصّاف
عجزت ولا وصلت اللي ابيه بعالم الانسان
وهو انسان في حاله وانا ماني بعد خواف
لذا سافرت يالغالي ودام اللي تكوّن كان
بغيت اوصّف الرحلة ولو هي صعبة الاوصاف
على بحر سواده خوف شال من الدرر الوان
ركبت بعالي امواجه ولاني شايل مجداف
الين ان الفرج جاني وشالتني غصون البان
رمتني للسهول اللي خزاينها ذهب لصّاف
تعبت من المشي حتى وصلت لغابة الرمان
جنان وجنة الدنيا..جنون ولا لها عراف
اناظر للضفاف اللي دهشني رسمها الفتان
سواليف تبعثرها حزينة غامضة وخفاف
واناظر لمحة البارق وسيف الموت والطوفان
سهيت بنظرتي حتى منعني للنظر سيّاف
تراها باختصار الموت والا عيشة الحرمان
وانا محروم يالغالي ولكن شغلتي طواف
اطوف العالم بلهفة ولا اضعف ولا انهان
ولا اشاور ولا اطلب مصاريف وسند واحلاف
