سر يا قلم وارعف على الطرس بالزاج
وزخرف خدود الناصعات اللواعيج
من هاجس فالقلب والصدر وهاج
فتّح صناديق الضمير المزاليج
مافاد به قفل ولا فاد مزلاج
يلقي مداخيل ولا له مخاريج
لا غاب عني ساعة صابه خلاج
وعود ولوذ بالضلوع المعاويج
وهاضة على اشطون وفكار وازعاج
وقلبي غدي للهم بيت ومساهيج
وجرح الزمن مستعصي ماله اعلاج
دامه صفي لهل الحسد والهواريج
اللي مع الهكرات فيهم تغناج
اهل القلوب الي عليه مغاليج
خطوي الهذور اللي بالاجواد هراج
اللي يروج تافه الهرج ترويج
ولا له مع اهل المرجلة وجه وحجاج
ووسط المجالس غادي له لجاليج
ولا له عليه درب قصده تعيواج
نذل مع اهل الطيب ماله مناهيج
ماله مع اهل الطيب مدخل ومخراج
شربه مه قروم النشامى رجاريج
وقت به الطيب سناقيه تنعاج
ولهل الردى يضحك بيض مباليج
