محتاجني بس أنا أكثر واحد احتاجك
جيتك بوقت تشاركني مع اظروفه
من حالتي لا تواخذني على إحراجك
ماجيتك إلا بحال مثل ما تشوفه
لا تقول مزعج وأنا يعجبني إزعاجك
وان قلت ملقوف ناس الحب ملقوفة
ماهو خساره فرحك وفلة احجاك
والكلمة ألي مابين الناس ما لوفه
يالطرقي اللي ضميت إن كنت هداجك
أكسر ظماء الوقت كان اشتدت اصيوفه
الورد عندك سجين وينطر افراجك
خله تفرعن زهوره نفسي أشوفه
وين أنت وين الحرير وين ديباجك
واللول والدر والمرجان مرصوفه
عنك وتشكي وفاك وتسكن أدراجك
خله يبين الذهب وتميز أو صوفه
أما أنت تاج الذهب وألا الذهب تاجك
هي لمعة من بها خدك ومكشوفه
بينك وبين القمر يضيع هراجك
ياقطعة من جبين البدر مخطوفه
غياهب اليم تدفعني بها امواجك
وارسي على أصداف والمحار مصدوفه
والليل غطى ضفاف البحر واسراجك
والمد والجزر يهدى ماهدى خوفه
والجرح طول مداه وطول اعلاجك
وإذا استمر النهاية منك معروفه
أثلجت صدري وعارض نومي اثلاجك
والحلم يعبر ولا غيرك مع اطيوفه
وإذا ضواك المساء واحترت بأبراجك
أنا لك البرج الأول يأول اضيوفه
مشاعر ترجمت عن طيب منهاجك
فوق الورق سجلت لك كل معزوفه
ولا عاد تسأل تقول أيش آخر إنتاجك
إن مرك اسمي تهجه واكتب احروفه
