مافيه داعي للغلط هد الأعصاب
أخلاق يا تجريح قلبي وطبّه
إذا اتصالي شايفٍ ماله اسباب
عندك فانا عندي له ألفين سبّه
تراي لا مزعج ولا نيب لعاب
يامن فؤادي بالتغلي لعبّه
عطني دقايق يا بعد تلع الأرقاب
وان ما صلح لك هرج مغليك كبه
أنا على وضح النقا منك منصاب
ربي جعل لك في فؤادي محبه
ولاجيتك بسيفٍ بكفي ومشعاب
أنا أدري أن الحب ما ينغصب به
جيتك مشاعر كلها حبٍ واعجاب
ما ابغاك تلحقني ملام ومسبه
اهرج معي ياصاحبي هرج الأحباب
خلك محبٍ يعتني في محبه
افتح معي على الشرف للهوى باب
برضاك.. ولا حط قفلٍ وظبه
يازين أنا للمقبل أقبل بترحاب
ومن صد قلت الله ربي وربه
