البارحة جاني خبر والخبر شين
لاعاد ربي ساعته يوم جاني
يوحي نباه بصد وفراق غالين
والقلب من يم الغضي مايداني
ارخصت عبرات العيون المثامين
وصفّقت بالكفين من ما دهاني
وسهرت انا والهم والناس ممسين
لين إن فصّاح اسود الليل باني
يلومني ناسٍ عن الود سالين
ناسٍ من اسباب الهوى ماتعاني
ماجربو لوعات فرقا المحبين
وما لاعهم مثلي فراقٍ كواني
يازين وش ذا اللي سمعناه يازين
تنوي بهجري يارهيف الثماني
وانا عليك احرص من الرمش للعين
لا اشركت معك بخافقي شخص ثاني
إن كان عندك ما لفعلي براهين
وغيّرك ياترف الشباب الزماني
خذ كلمة تقنعك حاضر وبعدين
النفس ماترضى بمن لارضاني
ان جيت قلت الف تراحيب وأهلين
وإن رحت مالك في فؤادي مكاني
مهونة الرجال طرد المقفين
قالوه قبلي محكمين المعاني
ياعين لاتبكين وشفيك تبكين
تبكين حي داله مابكاني
خلي دموعك ياعيوني مساجين
لفراق من يبكي فراقي ثواني