يوم غاب الزين سامرت الليال
وابتدى ليل السهر معنا عشير
ياحبيبي ودنا بشوفك تعال
وش لنا بالبعد ما بالبعد خير
مانبي نقطع مواعيد الوصال
خلنا وياك والشوق الكبير
خلنا ناصل مفاهيم الخيال
في دروب الحب أخطانا تسير
قالها قلب عن افراقك محال
حبنا بالروح ياروحي أسير
لو نشوف الموت من ظلمك حلال
كم نفس بالهوى قلبه ضرير
نشرب الأهات في بعدك زلال
ونأخذ الدنيا على حبل قصير
ما تشوف الدمع من فرقاك سال
وجرح قلبي لو بقى فيني خطير
من زمان القلب معطيك الدلال
عاشق الديره الأول والأخير
بالحلى والزين يالغالي مثال
أشهد أن الزين مع زينك خشير
يا هلا بك عد ماعدو مقال
وعد ما في الكون من طير يطير
وعد ما هبت رياح من الشمال
وعد ما في الخلق من حاكم وأمير
أمسح الاحزان عن وجهي تعال
خلها عيون الحزن بشوفك تنير
احلى وقفه ناخذه يا أحلى منال
بالغلى كلن على خله يغير
نطوي الأهات مع جرح الليال
وينتهي ليلٍ بدا معنا عشير