دخيل الدمعة اللي وقفت بين الهدب والموق
ودخيل القلب لابيح كنينه وانشغل باله
دخيل الله دخيل الله من هموم لبست مخلوق
الى منه نسى هم لقى همين قباله
انا ما همني ثوب من صروف الزمن مشقوق
عمر عيب الفتى ما صار في ثوبه وفي نعاله
انا دايم على وجهي ما احب امشي واناظر فوق
رضيت بقسمة الله لي وكل راضي بحاله
ان انسان خلقه الله انا روح وجسد وعروق
وصلت حبالي بربي وقلبي وصل حباله
صدق من قال في هالوقت بعض الشعر ما له ذوق
وكذب في ها الزمن من قال شعره حسبة عياله
دخيل الله من اللي لا مشى يمشي وهو مطفوق
ترك عقله وراه وراح يتبع خيبة افعاله
ودخيل الله من اللي ما درى هو ليش اهو مخلوق
ركب درب الخطا واقفى يسار وميل عقاله
إذا جاك الولد نشمي او انه جاك راعي بوق
حرام انك تقول ان الولد طالع على خاله
الا كم واحد في الشر له خيل وله ابل ونوق
وإذا جا طاري للخير قفي وسرح جماله
انا اللي من زمان اول رضيت ابقى قديم الشوق
وعسى اللي له نصيب وفال يلقى شي من قاله
ألا يا ما اكبر همومي تجي ومعها رعد وبروق
غدا جوفي لها مرعى وغدت بالصدر نزاله
بيجي لك يوم يا خاين وترجع نادم ومحروق
وتقول بساعة الفجعة قديم الشوق ما قاله
