يا نجد ما مثلك إلى ما ازهر العود
واعشوشبت ريضان نجد العذيه
يا نجد يا زينك إلى هبّت النود
يم الفياض اللي زهرها نديه
يا زينها لا خضرّت الأرض يا سعود
من قبلة «المرّوت*».. «للمكمكنية*»
يا زينها لازانها الروض و«الذود»
وهبّت صبا ياويل روحي عليه
الماطر اللي في قفا الوسم محدود
أسقى ظما يا نجد والأرض حيه
«لخريم*».. «للملقا*» على «روضة سعود*»
وإلا على «روض الكسر*» «لتمريه*»
«لقنيفذه*» «للسر» «لديار صاهود»
ويم «الحصاة*» فياض «للحرمليه*»
يا علّها سيل على برق ورعود
يمطر على وديانها عقربيه
يزهر «طريف الحبل*» «لهجال سامود*»
يدعي «السحق*» «للجله*» رمث ونصيه
* أسماء لأماكن وفياض وسهول في نجد
